काठमाडौं । प्रजातान्त्रिक विचारप्रति आस्था राख्ने पेशागत संघ संगठनले सरकारको कार्यशैलीका प्रजातान्त्रिक पद्धति कमजोर बन्दै गएकोमा चिन्ता व्यक्त गरेका छन् ।
प्रजातान्त्रिक विचार समाजले आज काठमाडौंमा गरेको छलफलमा वक्ताहरुले सरकार विभिन्न विधेयक बनाएर नै प्रजातान्त्रिक मूल्य मान्यता कुण्ठित गर्न लाग्नु दूर्भाग्य भएको बताए ।
गुठी, विश्वविद्यालय, प्रेससंग सम्बन्धित, राष्ट्रिय मानवअधिकार आयोगलगायतका विधेयकमा राखिएको विषयले सरकार लोकतान्त्रिक मूल्य मान्यताबाट विचलित हुँदै गएको पुष्टी भएको आरोप लगाए ।
उनीहरुले अन्तर्राष्ट्रिय फोरमहरुमा व्यक्त प्रतिबद्धता विपरित मानवअधिकारको गम्भीर उल्लंघन गर्ने गरेकाले विश्वमा नेपालको छवी बिग्रर्दै गएको बताए ।
कार्यक्रममा मानवअधिकारकर्मी कपिल श्रेष्ठ, बार एसोशियसनका पूर्व अध्यक्ष हरिहर दाहाल, विचार समाजका अध्यक्ष डा.केदारनरसिंह केसी, पत्रकार महासंघका पूर्व अध्यक्ष हरिहर विरहीलगायतले यस्तो चिन्ता व्यक्त गरेका हुन् ।
